قصيدتين للفاجومى احمد فؤاد نجم

عزيزى المواطن
.................................................. .............


احمد فؤاد نجم
......................
عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال
و غمض عيونك وربى العيال

بلاش المناكفة و لايم و عيش
هتتعب معانا و سهمك يطيش
ونلفق لاهلك قضية حشيش

تعالى و هاودنا و عدى الامور
و عيش فى الطراوة و خشالطابور
لكن لو هتزعل و دمك يفور
هتعرف نهايتك فى بحر ووابور

وبعد ماكنت فى نفسك امير
هتصبح حرامى و ندل و اجير
و نقدرنلخبط فى اصلك كتيير
و جدك شحاتة هيصبح شامير

هيحلف حبايبك انهم شافوك
بتقبض يا خاين و تقتل اخوك
ساعتها مراتك هتلعن ابوك
و تلطم و تنعىولادك وابوك

مالكش انت دعوة بأية اللى ضاع
و مين اللى شارى و مين اللى باع
و مين اللى كيل و مين اللى شال
ومين بكرة يركب اعناق الرجال

اعقل وحب الحكومة و حب السلام
و علم ولادك يشدوا الحزام
علشان بكرة ياكلو بط و حمام
و ينسوا الاسية وحتى الخزوق

فلازم يا صاحبى تغمض عنيك
و طنش علينانبشبش عليك
و اياك تثور لنقطعلكايديك
ويصدق عليك اللى قالفاللى زيك
لا ارضا قطعت ولا ظهرا ابقيت

عزيزى المواطن بتاع النضال
يا راكب دماغك و غاوى الحلال
نصيحة يا صاحبى بلاش الخيال





النعمة فاقت حدها
.................................................. .............


احمد فؤاد نجم
......................
نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نستحلفك ....... نسترحمك
نستعطفك .......نستكرمك
ترحمنا من طلعة جنابك
حبتين
عايزين نجرب خلقة تانية
ولو يومين
اسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد غازه لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد مستوطنة
(متسلطنة بالسرطنة)
إيه اللي خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
(بخيار)حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم
يحيا الزعيم